சென்னை: தமிழ்நாடு முழுவதும் வடகிழக்கு பருவமழை தொடங்கியதில் இருந்து பல மாவட்டங்களில் கனத்த மழை பெய்து வந்தது. இதனையடுத்து டிச.5 அன்று வங்கக்கடலில் தென்கிழக்கு பகுதியில் காற்றழுத்த தாழ்வு மையம் உருவானது. இது வலுவடைந்து இரண்டு நாள்களுக்கு முன் புயலாக உருப்பெற்றது. இதனையடுத்து இதற்கு "மாண்டஸ்" எனப் பெயரிடப்பட்டது.
இந்நிலையில் நேற்று (டிச.9) இரவு முதல் சென்னையில் பலத்த காற்று வீசியது. மணிக்கு 15 கி.மீ வேகத்தில் நகர்ந்த மாண்டஸ் புயல் இன்று (டிச.10) அதிகாலை 3 மணி அளவில் மாமல்லபுரம் அருகே கரையைக் கடந்தது. மேலும் புயல் வலுவிழந்து குறைந்தபட்ச காற்றழுத்த தாழ்வு மையமாக மாறியது.
புயல் கரையைக் கடந்து உள்ளதால் தற்போது பல மாவட்டங்களில் பலத்த மழை பெய்து வருகிறது. சென்னை மற்றும் அதன் சுற்று வட்டார பகுதிகள் மாண்டஸ் புயலால் பெரும் சேதம் அடைந்துள்ளது. சென்னையில் 70 கி.மீ முதல் 80 கி. மீ வேகத்தில் பலத்த காற்று வீசியதால் மின்கம்பங்கள், பல மரங்கள் சாய்ந்தன.
காசிமேட்டில் கரையில் நிறுத்தி வைக்கப்பட்டிருந்த 150 படகுகள் சேதமடைந்துள்ளது. தாழ்வான பகுதிகளில் தண்ணீர் தேங்கியுள்ளது. புயலால் சேதமடைந்த பகுதிகளில் தேசிய பேரிடர் மீட்புப் படை வீரர்கள் மீட்புப் பணியில் ஈடுபட்டுள்ளனர்.
மாண்டஸ் புயல் காரணமாகச் சென்னையில் நேற்று இரவு முதல் இன்று காலை வரை சுமார் 40 இடங்களில் நூற்றுக்கணக்கான மரங்கள் முறிந்து விழுந்துள்ளன. சாலையில் விழுந்த மரங்களை மீட்பு படையினர் அகற்றி வருகின்றனர். இந்த விபத்துக்களில் உயிர் சேதம் இல்லை.
இந்திய வானிலை ஆய்வு மையம் வெளியிட்ட அறிக்கையில் இன்று (டிச.10) 20 மாவட்டங்களில் லேசானது முதல் கன மழை வாய்ப்புள்ளதாகத் தெரிவித்துள்ளது. இது குறித்து இந்திய வானிலை ஆய்வு மைய தென்மண்டல இயக்குநர் பாலசந்திரன் செய்தியாளர்களிடம் பேசுகையில்,”மாண்டஸ் புயல் வட உள் மாவட்டம் வழியாகக் கடந்து செல்வதால் சென்னை மற்றும் அதன் சுற்றுவட்டாரப் பகுதிகளில் மழை பெய்யும்.
அதிகபட்சமாக காட்டுப்பாக்கத்தில் 18 செ.மீ மழை பதிவாகியுள்ளது. வில்லிவாக்கத்தில் 6 செ.மீ, புழல் 10 செ.மீ, பூந்தமல்லி 10 செ.மீ, காஞ்சிபுரம் 7 செ.மீ, நுங்கம்பாக்கத்தில் 10 செ.மீ பதிவாகியுள்ளது. பின்னர் மதியம் வரை கடல் சீற்றத்துடன் காணப்படலாம்” எனத் தெரிவித்தார்.
இதையும் படிங்க:"கலெக்டர் சார் கொஞ்சம் கருணை காட்டுங்க" - வைரலாகும் சிறுவன் வீடியோ!
